ویب ڈیسک:وزیراعظم  محمد شہباز شریف نے پاک بھارت جنگ بندی سے متعلق ردعمل کا اظہار کیا ہے۔

تفصیلات کے مطابق اپنے بیان میں شہبازشریف کاکہنا تھاکہ ہم صدر ٹرمپ کی قیادت اور خطے میں امن کیلئے  ان کے فعال کردار پر ان کا شکریہ ادا کرتے ہیں اور اس نتیجے کو ہم نے خطے میں امن و استحکام کے مفاد میں قبول کیا۔

انہوں نے کہا کہ امریکی نائب صدر اور وزیر خارجہ کا بھی جنوبی ایشیا میں امن کیلئے خدمات پر شکریہ ادا کرتے ہیں اور یہ پیشرفت ان مسائل کے حل کے لیے ایک نئے آغاز کی علامت ہے۔

ان کا کہنا تھاکہ ان مسائل نے طویل عرصے سے خطے کو متاثر کیا اور امن، خوشحالی اور استحکام کی راہ میں رکاوٹ ڈالی۔

خیال رہے کہ بھارت کی جارحیت پر پاکستان نے منہ توڑ جواب دیا اور آپریشن بُنْيَان مَّرْصُوْص ( آہنی دیوار) کے دوران بھارت میں 10 سے زائد اہداف کو نشانہ بنایا۔

آدم پور، ادھم پور، بٹھنڈا، سورت گڑھ، مامون، اکھنور، جموں، سرسہ اور برنالہ کی ائیر بیسز اور فیلڈز کو تباہ کیا، بھارتی اڑی فیلڈ سپلائی ڈپو، سرسہ اور ہلواڑا ائیر فیلڈز بھی تباہ کیں۔

پاکستانی فتح 1 میزائل سسٹم کے ذریعے متعدد بھارتی اہداف کو نشانہ بنایا، آدم پور میں پاک فوج نے جے ایف 17 تھنڈر سے بھارتی ائیر بیس پر ہائپر سونک میزائل سے ڈیڑھ ارب ڈالر مالیت کا ائیر ڈیفنس سسٹم ایس 400 تباہ کردیا، پاک فوج نے میزائل لے جانے والے جے ایف 17 تھنڈر کی ویڈیو جاری کردی۔

پاکستان کی جوابی کارروائی کے بعد دونوں ممالک کے درمیان جنگ بندی ہوگئی۔